Sakhua leh hnam tam zâwk te chuan nupui/pasal pakhat chauh neihna (monogamy) an kalpui a, nupui/pasal pakhat aia tam neite chungah dân angin ro an rêlsak ṭhin a ni. Hetih lai hian, sakhua leh pâwl ṭhenkhat chuan nupui/pasal pakhat aia tam neih an phal ve thung.
Muslim-te chu nupui pakhat aia tam neih phalte zînga mi an ni a, amaherawhchu, a nupui hmasa ber chuan nupui dang nei turin a phal hmasak angai thung a ni. Chumi piahah inneihna senso tûr zawng zawng a tum theih vek angaih bâkah a nupuite chu a chawm zo tûr a ni bawk.
Mahse, pa pakhat Katabi, Wakiso district, Uganda mi chuan an Muslim dân in ramri a kham chin thleng rakin a rualin nupui 3 a nei a, achhanchu, a hrang ṭheuh chuan a sum leh paiin a tlin lo a ni.
Khawchhunga buhfai zuartu, kum 50-a upa Mohammed Ssemanda chu a ruala nupui 3 a neihna thlalak netizens(Internet khawihtu) ten an hmuh hnuah social media ah a lâr ta hle a ni. Ssemanda chuan a hausak loh avângin a hrang ṭheuh chuan inneihna a buatsaih thei lo tih a sawi a, a nupuite chuan pawisa vâng ni lovin, hmangaihna avângin an nei zâwk tiin a sawi.
A nupui kum 48 mi, Salmat Naluwugge chu kum 20 chhûng a nupui a ni tawh tih an târlang a, mahse, inneihnaa tel ve turin thutlukna an siam a, inneih thar lehna angin a tel ve leh a ni.
A nupui hmasa ber nen fa 5 an nei tawh a, Ssemanda nupui tharte hi unau niin fa an nei ve ve tawh bawk. Mo neitu chuan a nupui thar kum 27 mi, Jameo Nakayiza leh kum 24 mi, Mastulah Namwanje te chu a nupui hmasa Naluwugge te nen inngeih takin an chêng ho tih a sawi.
Chutih lai chuan, a nupui hmasa paw’n, a pasalin nupui thar 2 a neihnaah a teltîr ve chu lawmawm a ti hle a, a ruala inneihnaa an tel vek chu, intluk tlâng takin a enkawl dawn a ni tih a entîr tiin a sawi ve bawk.
(VIDEO)
